Ye Ishq Ki Galiyan Jin Mein Hum Kis Kis Aalam Mein Aae Gae

Jameeluddin Aali

ye ishq ki galiyan jin men ham kis kis aalam men aa.e ga.e

kahti hain ki hazrat ab kaise tum aaj yahan kyuun paa.e ga.e

ik shart hai yaan ḳhushbu-e-vafa yaad aa.e to karna yaad zara

jab tum pe bharosa tha gul ka kya mahke kya mahka.e ga.e

hai ye vahi lauh-e-bab-e-junun likkha hai na puchho kya aur kyuun

tum laa.e kalid-e-jazb-e-darun aur sab manzar dikhla.e ga.e

ik taḳht-e-ravan-e-sher aaya kuchh shah-e-suḳhan na farmaya

phir taj-e-tarannum pahnaya aur ghazlon men tulva.e ga.e

ik tab-e-rasa se kya banta ye un galiyon ka sadqa tha

vo lafz aur vo uslub mile aur vo ma.ani sajva.e ga.e

hairat se Thahar jaati thi yahan ye kahti hui har kahkashan

jab yuun mil jaana mumkin hai to phir ham kyuun phaila.e ga.e

duniya ke sahi andaz bahut un galiyon ke bhi hain raaz bahut

jo Thahre vo sar-afraz hue jo nikle vo Thukra.e ga.e