milan ki saaat ko is tarah se amar kiya hai
tumhari yadon ke saath tanha safar kiya hai
suna hai us rut ko dekh kar tum bhi ro pade the
suna hai barish ne pattharon par asar kiya hai
salib ka baar bhi uthao tamam jivan
ye lab-kushai ka jurm tum ne agar kiya hai
tumhen khabar thi haqiqaten talkh hain jabhi to!
tumhari ankhon ne khvab ko mo’atabar kiya hai
ghutan badhi hai to phir usi ko sadaen di hain
ki jis hava ne har ik shajar be-samar kiya hai
hai tere andar basi hui ek aur duniya
magar kabhi tu ne itna lamba safar kiya hai
mire hi dam se to raunaqen tere shahr men thiin
mire hi qadmon ne dasht ko rah-guzar kiya hai
tujhe khabar kya mire labon ki khamoshiyon ne!
tire fasane ko kis qadar mukhtasar kiya hai
bahut si ankhon men tirgi ghar bana chuki hai
bahut si ankhon ne intizar-e-sahar kiya hai
Leave a Reply