dost kuchh aur bhi hain tere alava mire dost
ka.i sahra mire hamdam ka.i dariya mire dost
tu bhi ho main bhi huun ik jagah pe aur vaqt bhi ho
itni gunja.ishen rakhti nahin duniya mire dost!
teri ankhon pe mira ḳhvab-e-safar ḳhatm hua
jaise sahil pe utar jaa.e safina mire dost!
ziist be-ma.ani vahi be-sar-o-samani vahi
phir bhi jab tak hai tiri dhuup ka saaya mire dost!
ab to lagta hai juda.i ka sabab kuchh bhi na tha
aadmi bhuul bhi sakta hai na rasta mire dost!
raah takte hain kahin duur ka.i sust charagh
aur hava tez hui jaati hai achchha mire dost!
Leave a Reply