harim-e-naz se aata hai bahra-var koi
dil a.ina pe liye naqsh-e-fi-hajar koi
hisar-e-dard ki uncha.i baḌhti jaati hai
ḳhushi ki andhiyan aa kar bana.en dar koi
paḌa hai yadon ke hujre men qufl muddat se
hanuz deta hai dastak si mo’atabar koi
chamakti raah to nazron se hai abhi ojhal
charagh-e-charḳh ki milti nahin ḳhabar koi
ye shaam Daale hue tan pe surma.i chadar
gila karegi siyah-shab se muḳhtasar koi
tamam ḳhvahishen ḳhashak men huiin tabdil
ghaḌi men sho.ala na kar de kahin sharar koi
tiri zaban se lipTi hai chashni-e-havas
kahan se aa.e tiri baat men ‘asar’ koi
Leave a Reply