Sameena Raja
dil rahega yunhi betab nazar aata hai
jagne par bhi vahi ḳhvab nazar aata hai
samne dekhun to paḌta hai mire dil pe vo aks
muḌ ke dekhun to vo mahtab nazar aata hai
khaa.e jaata hai mire baagh ke har peḌ ko ghun
duur hi duur se shadab nazar aata hai
ghusl ke vaste shabnam nahin hogi kaafi
saya-e-gul jo tah-e-ab nazar aata hai
hai miri niind ke malbe pe hi ta.amir us ki
ye jo ik ḳhvab pas-e-ḳhvab nazar aata hai
kya ajab shahr-e-tamanna tha abhi aur pal men
parda-e-chashm pe sailab nazar aata hai
Leave a Reply