Aziz Warsi
mire farzana banne ka bahut imkan baaqi hai
abhi jaib-o-gareban ki mujhe pahchan baaqi hai
mire siine men tere tiir ka paikan baaqi hai
ba-alfaz-e-digar rudad ka unvan baaqi hai
baqa-e-javedan baḳhshi hai jis ko teri nazron ne
mire dil men abhi aisa bhi ik arman baaqi hai
sarisht-e-husn ka tabdil hona ghair-mumkin hai
sarisht-e-ishq men jis vaqt tak arman baaqi hai
‘aziz-varsi’ us ki haqiqat kis tarah samjhe
abhi to zaat ka apni hi kuchh irfan baaqi hai
Leave a Reply