koi ḳhush hai koi nakam hai aisa kyon hai
hai kahin sub.h kahin shaam hai aisa kyon hai
jin ki ankhon men khaTakta tha main kanTe ki tarah
un ke honTon pe mira naam hai aisa kyon hai
chahe jis ki ho ḳhata koi bhi mujrim ho magar
tire divanon pe ilzam hai aisa kyon hai
husn ki anjuman-ara.iyan taslim magar
ishq avara-o-badnam hai aisa kyon hai
aaj har shaḳhs ko har moḌ pe har mahfil men
shikva-e-gardish-e-ayyam hai aisa kyon hai
main bhi mamnun huun saaqi ka magar mere liye
koi saghar na koi jaam hai aisa kyon hai
jab hai be-parda koi sahab-e-jalva ‘anvar’
raushni sirf lab-e-bam hai aisa kyon hai
Leave a Reply