Koi KHush Hai Koi Nakaam Hai Aisa Kyon Hai

koī ḳhush hai koī nākām hai aisā kyoñ hai

hai kahīñ sub.h kahīñ shaam hai aisā kyoñ hai

jin kī āñkhoñ meñ khaTaktā thā maiñ kāñTe kī tarah

un ke hoñToñ pe mirā naam hai aisā kyoñ hai

chāhe jis kī ho ḳhatā koī bhī mujrim ho magar

tire dīvānoñ pe ilzām hai aisā kyoñ hai

husn kī anjuman-ārā.iyāñ taslīm magar

ishq āvāra-o-badnām hai aisā kyoñ hai

aaj har shaḳhs ko har moḌ pe har mahfil meñ

shikva-e-gardish-e-ayyām hai aisā kyoñ hai

maiñ bhī mamnūn huuñ saaqī kā magar mere liye

koī sāġhar na koī jaam hai aisā kyoñ hai

jab hai be-parda koī sāhab-e-jalva ‘anvar’

raushnī sirf lab-e-bām hai aisā kyoñ hai

Leave a Comment