na sirf ye ki zamane ka Dhab dikha.i de
ghazal to vo hai ki andar ka sab dikha.i de
badan ki us ke kasavaT hi kya qayamat hai
kisi libas men dekho ghazab dikha.i de
main apni iid mana luun mujhe kisi se kya
na jaane phir vo mira chand kab dikha.i de
main us ko dekhun kuchh aisa ki dekh bhi na sakun
vo apne aap men chhup jaa.e jab dikha.i de
koi bata.e sahar ko kahan talash karun
jab asman bhi bairun-e-shab dikha.i de
‘shakil’ husn-e-talab ka mo.amla hai vahan
vo kamyab hai jo be-talab dikha.i de
Leave a Reply