Na Sah Sakunga Gham-E-Zat Go Akela Main

Anwar Shuoor

na sah sakunga gham-e-zat go akela main

kahan tak aur kisi par karun bharosa main

hunar vo hai ki jiyun chand ban kar ankhon men

rahun dilon men qayamat ki tarah barpa main

vo rang rang ke chhinTe paḌe ki is ke ba.ad

kabhi na phir na.e kapḌe pahan ke nikla main

na sirf ye ki zamana hi mujh pe hansta hai

bana hua huun ḳhud apne liye tamasha main

mujhe sameTne aaya bhi tha koi jis vaqt

dayar o dasht o daman men bikhar raha tha main

ye kis tarah ki mohabbat thi kaisa rishta tha

ki hijr ne na rulaya use na taḌpa main

paḌa rahun na qafas men to kya karun aḳhir

ki dekhta huun bahut duur tak dhundlaka main

bahut malul huun ai surat-ashna tujh se

ki tere samne kyuun aa gaya sarapa main

yahi nahin ki tujhi ko na thi umiid aisi

mujhe bhi ilm nahin tha ki ye karunga main

main ḳhaak hi se bana tha tu kaash yuun banta

ki us ke haath se girte hi TuuT jaata main