tire siva miri hasti koi jahan men nahin
ye raaz faash hai haan se nahin main haan men nahin
jo la-makan hai muqayyad kisi makan men nahin
ta.ayyunat nishan men hain be nishan men nahin
sifat jalva-gah-e-zat hai tajalli-e-husn
ye jism jalva-gah-e-jan hai nur-e-jan men nahin
zaban-e-hal se hai kaif-e-be-ḳhudi goya
ye vo zamin hai ki jis ka nishan zaman men nahin
farogh-e-hasti-e-mutlaq hai jalva-e-pindar
hijab-e-hasti-e-mauhum darmiyan men nahin
nishan yaqin ka do-alam men qalb-e-sakin hai
qarar vahm men asudgi guman men nahin
miri fasurda-dili ne na.e khila.e hain gul
nahin ki mausam-e-gul mausam-e-ḳhizan men nahin
main nang-e-dehli huun nang-e-suḳhan-varan ‘sahir’
asatiza ki zaban kya karun dahan men nahin
Leave a Reply