jo dil men khaTakti hai kabhi kah bhi sakoge
ya umr bhar aise hi pareshan phiroge
patthar ki hai divar to sar phoḌna sikho
ye haal rahega to jiyoge na maroge
tufan uThaoge kabhi apne jahan men
ya aankh ke paani hi ko sailab kahoge
so.e ho andhere men charaghon ko bujha kar
aa.ega nazar ḳhaak agar jaag uThoge
apni hi haqiqat ko na pahchanne vaalo
tum parda-e-aflak ko kya chaak karoge
ai barq ki manind guzarte hue lamho
kya aankh jhapakne ki bhi mohlat nahin doge
raushan bhi karoge kabhi tariki-e-shab ko
ya sham.a ki manind pighalte hi rahoge
arzan hai bahut ḳhuun farozan hai bahut shaam
kya apni hi mahfil men charaghan na karoge
maana ki kaThin raah hai dushvar safar hai
kya ek qadam bhi na mire saath chaloge
guzre hue lamhe ki vo be-nam kasak huun
tum jis ki tamanna men pareshan phiroge
chahoge nishan bhi na rahe mera jahan men
gar zikr karoge to mira naam na loge
ye gard-e-safar haal vo kar degi ki ‘shahzad’
tum apni bhi surat ko na pahchan sakoge
Leave a Reply