Iqbal Sajid
jaane kyuun ghar men mire dasht-o-bayaban chhoḌ kar
baiThti hain be-sar-o-samaniyan sar joḌ kar
kitni nazren kitni aasen kitni avazen yahan
lauT jaati hain dar-o-divar se sar phoḌ kar
jaane kis ki khoj men paiham bagule aaj kal
phir rahe hain shahr ki galiyon men sahra chhoḌ kar
mujh pe patthar phenkne valon ko tere shahr men
narm-o-nazuk haath bhi dete hain patthar toḌ kar
bas raha huun aaj us mahaul men ‘sajid’ jahan
log baraton men jaate hain janaze chhoḌ kar
Leave a Reply