na ho Thikana koi jis ka tere ghar ke siva
vo uTh ke jaa.e kahan teri rahguzar ke siva
dil-e-hazin ki tamanna nigah ke matlub
ḳhuda rakhe vo sabhi kuchh hain charagar ke siva
raza-e-dost tab-o-tab sina-e-dushman
dua ko aur bhi kuchh chahiye asar ke siva
vo soz-e-dil ki jise log jaan kahte hain
nahin hai aur koi shai tiri nazar ke siva
payam-e-ḳhanda-e-gul aur nashat-e-sub.h-e-chaman
saba ke paas hai sab kuchh tiri ḳhabar ke siva
hai jan-e-bulbul-e-shaida to chaar tinkon men
qafas men kuchh bhi nahin ek musht-e-par ke siva
mila hai azmat-e-adam ke naam se jo mujhe
vo qarz kis se ada hoga mere sar ke siva
unhi ko nala-e-bulbul kahen ki ḳhanda-e-gul
chaman men kuchh bhi nahin sho.ala-e-sharar ke siva
sukun-e-dil ke liye ham kahan kahan na ga.e
‘sarosh’ kuchh na mila zahmat-e-safar ke siva
Leave a Reply