Jaleel Aali
apne hone se bhi inkar kiye jaate hain
ham ki rasta tira hamvar kiye jaate hain
roz ab shahr men sajte hain tijarat mele
log sehnon ko bhi bazar kiye jaate hain
Dalte hain vo jo kashkol men sansen gin kar
kal ke sapne bhi giraftar kiye jaate hain
kis ko malum yahan asal kahani ham to
darmiyan ka koi kirdar kiye jaate hain
dil pe kuchh aur guzarti hai magar kya kiije
lafz kuchh aur hi iz.har kiye jaate hain
mere dushman ko zarurat nahin kuchh karne ki
us se achchha to mire yaar kiye jaate hain
Leave a Reply