Waris

Akbar Hyderabadi

vo abnormal nahin tha

sirf us ko normal banne ki hasrat thi

kai ḳhanon men us ki zindagi baTne lagi thi

vo apni koshish-e-na-mo’tabar se tang aa kar

nim-jan ho kar

ek ḳhane men panah lene laga tha

bani amat-gah-e-tir-e-nafrat shaḳhsiyat us ki

use bhi ḳhud se nafrat ho chuki thi

magar is nafrat-e-manus ki takrar se us ne

durusht o na-muvafiq zindagi se sulh kar li thi

yahi tha kisa-e-aḳhlaq us ka

gharibi ne sharafat chhin li thi

aur us ki shaḳhsiyat ke pairahan men

guhar-baron ke badle sang-reze jaḌ diye the

vo abnormal nahin tha

magar ab us men ḳhud ko normal karne ka yaara bhi nahin tha

use ab ye gavara bhi nahin tha

gali-kuchon ki saari gandagi ka

tirgi ka

vo ab haqdar varis ban chuka tha