Ahmad Ali Barqi Azmi
mushtahar naam karo tum mira akhbaron men
main to shamil huun mohabbat ke gunahgaron men
mar ke bhi zinda-e-javed hain fankar-e-azim
jo nazar aate hain tarikh ke shah-paron men
vaqt ke saath badal jaate hain jin ke atvar
mujhe shamil na karo aise qalam-karon men
log ab ghar se nikalte hue yuun darte hain
nazr-e-dahshat kahin ho jaaen na bazaron men
jin ke sur taal hain ab raunaq-e-bazar-e-adab
bat gai bazm-e-sukhan aise adakaron men
koi leta hi nahin bulbul-e-shaida ki khabar
buum aate hain nazar shakh pe gulzaron men
aaj mafqud hai vo jazba-e-ashab-e-rasul
raqs karte the jo talvar ki jhankaron men
jis ke aslaf ki azmat ke nishan hain har su
jaae ibrat hai vahi qaum hai nadaron men
log kahte hain use qasr-e-tamanna apna
jis ke aslaf the apne kabhi meamaron men
jo kabhi mere isharon pe chala karte the
khu-e-ikhlas vo baaqi na rahi yaron men
naam hai saf.ha-e-hasti se ab un ka ghaeb
mulk-o-millat ke jo ‘barqi’ the vafadaron men
Leave a Reply