mere girya se na azar uThane se hua
fasla tai na.i divar uThane se hua
varna ye qissa bhala ḳhatm kahan hona tha
dastan se mira kirdar uThane se hua
mahmil-e-naz ki taḳhir ka ye saara fasad
rah-e-uftad ko bekar uThane se hua
shaaq guzra hai jo ahbab ko vo sadma bhi
bazm men misra-e-tahdar uThane se hua
yuun to mus.haf bhi uTha.e ga.e qasmen bhi magar
aḳhiri faisla talvar uThane se hua
gham nahin taḳht ko aur baḳht ko kho dene ka
kab mira hona bhi dastar uThane se hua
jagna tha mira hangama-e-hasti ka sabab
hashr barpa bhi digar-bar uThane se hua
gosha-e-bagh hua ḳhuld guzarne se tire
a.ina aks-e-ruḳh-e-yar uThane se hua
Leave a Reply