ab yahi saya-e-divar mira ghar Thahra
use chhoḌun bhi to kaise mira paikar Thahra
ab kisi aur jazire ka safar kyon kiije
main bhi insan huun ashob ka ḳhugar Thahra
vaqt ka apna safar abr ki apni manzil
ek pal ke liye saaya mire dar par Thahra
phir use pyaas ke sahra se pukara main ne
main ki mavvaj samundar ka shanavar Thahra
kyon na bargashta ho qismat ka sitara mujh se
ki sitara bhi vahi mah-e-munavvar Thahra
zabt lazim tha magar aankh men aansu bhar aa.e
aa ke sailab mere ghar ke barabar Thahra
rif.at-e-dar se insan ka bharam hai varna
kaun be-minnat-e-sultan sar-e-mimbar Thahra
Leave a Reply