abhi kuchh aur karishme ghazal ke dekhte hain
‘faraz’ ab zara lahja badal ke dekhte hain
judaiyan to muqaddar hain phir bhi jan-e-safar
kuchh aur duur zara saath chal ke dekhte hain
rah-e-vafa men harif-e-ḳhiram koi to ho
so apne aap se aage nikal ke dekhte hain
tu samne hai to phir kyuun yaqin nahin aata
ye baar baar jo ankhon ko mal ke dekhte hain
ye kaun log hain maujud teri mahfil men
jo lalachon se tujhe mujh ko jal ke dekhte hain
ye qurb kya hai ki yak-jan hue na duur rahe
hazar ek hi qalib men Dhal ke dekhte hain
na tujh ko maat hui hai na mujh ko maat hui
so ab ke donon hi chalen badal ke dekhte hain
ye kaun hai sar-e-sahil ki Dubne vaale
samundaron ki tahon se uchhal ke dekhte hain
abhi talak to na kundan hue na raakh hue
ham apni aag men har roz jal ke dekhte hain
bahut dinon se nahin hai kuchh us ki ḳhair ḳhabar
chalo ‘faraz’ ku-e-yar chal ke dekhte hain