abdul-hamid-adam

Hawa Sanke Khaaron Ki Badi Taklif Hoti Hai

hava sanke to kharon ko badi taklif hoti hai

mire gham ki baharon ko badi taklif hoti hai

na chhed ai ham-nashin ab ziist ke mayus naghmon ko

ki ab barbat ke taron ko badi taklif hoti hai

mujhe ai kasrat-e-alam bas itni shikayat hai

ki mere gham-gusaron ko badi taklif hoti hai

kaho maujon se lahra kar na yuun palten samundar se

ki ba-ghairat kinaron ko badi taklif hoti hai

gale milte hain jab aapas men do bichhde hue sathi

‘adam’ ham be-saharon ko badi taklif hoti hai

More Poems

Leave a Comment