Har Shab-E-Gham Ki Sahar Bhi Hogi

Mustafa Rahi

har shab-e-gham ki sahar bhi hogi

zindagi hai to basar bhi hogi

vo zamana bhi kabhi aa.ega

dil ki jab dil ko ḳhabar bhi hogi

dard kam-kam nahin afzun hoga

chashm pur-nam nahin tar bhi hogi

atish-e-ishq jise kahte hain

vo idhar hai to udhar bhi hogi

zulm hi zulm na hoga aḳhir

pyaar ki ek nazar bhi hogi

main ḳhata-kar-e-nazar huun lekin

ye ḳhata bar-e-digar bhi hogi

kitne vo ahl-e-nazar hain jin ki

husn-e-ma.ani pe nazar bhi hogi

jaane kya haal hamara hoga

jab mohabbat ki nazar bhi hogi

ham bhi honge tira gham bhi hoga

shab bhi aa.egi sahar bhi hogi

jalva-e-ghuncha-o-gul bhi hoga

shoḳhi-e-barq-o-sharar bhi hogi

azm bebak safar bhi hoga

raah pur-ḳhauf-o-ḳhatar bhi hogi

har aziyyat hi muqaddar hai agar

dasht to dasht hai ghar bhi hogi

bach rahi aaj havadis se agar

har kali kal gul-e-tar bhi hogi

ranj rahat men badal ja.ega

ḳhair dar-parda-e-shar bhi hogi

kuchh sitare bhi daraḳhshan honge

kuchh miri gard-e-safar bhi hogi