hai mukammal unhi se zaat miri
mere bachche hain ka.enat miri
main bas insaniyat ka qaa.il huun
puchhte kya ho zat-pat miri
ziist jiina muhal kar degi
yaad aa.egi baat baat miri
us ne bhi mera haath chhoḌ diya
jis ke hathon men thi hayat miri
us ne bas muskura ke dekha tha
khil uThi saari ka.enat miri
kis qadar be-misal sapna tha
chain se kaT ga.i hai raat miri
tere lahje se hausla pa kar
gungunane lagi hayat miri
jiit kar bhi vo ro diya ‘anvar’
us se dekhi ga.i na maat miri
Leave a Reply