Tanveer Ahmad Alvi
bazm-e-jan phir nigah-e-tauba-shikan mange hai
lams sho.ale ka to ḳhushbu ka badan mange hai
qad-o-gesu ki shari.at ka vo munkir bhi nahin
aur phir apne liye dar-o-rasan mange hai
raqs-e-kakul ke tasavvur ki ye shirin saa.at
shab ke phulon se mahakta hua ban mange hai
TuTte hain to bikhar jaate hain miTTi ke huruf
zindagi jin se charaghon ka chalan mange hai
jis ko ghere hue rahte hain havaon ke hisar
sham-e-jan mujh se vahi dil ki lagan mange hai
muskurahaT vo ki phulon pe shakar barsave
naaz us reshmi mathe pe shikan mange hai
phuul afsana bhi afsun bhi hai lekin ‘tanvir’
chashm-e-ḳhun-basta naya tarz-e-suḳhan mange hai
Leave a Reply