Raqs Karti Hain Falak Par Bijliyan Ab Kya Karun

Saeed Shahidi

raqs karti hain falak par bijliyan ab kya karun

meri punji hai yahi ik ashiyan ab kya karun

aar hai sunne se un ko dastan ab kya karun

mere qaabu men nahin meri zaban ab kya karun

alam-e-ghurbat hai main huun aur andheri raat hai

luT gaya aise men saara karvan ab kya karun

lijiye rone lage hichki bandhi ghash kar ga.e

aur abhi hai ibtida-e-dastan ab kya karun

duur manzil na-tavani se qadam uThna muhal

kya karun ai chara-saz-e-be-kasan ab kya karun

dil men aaya tha ki khinchun ek ah-e-pur-asar

un ki surat aa ga.i phir darmiyan ab kya karun

duur sahil na-ḳhuda mayus tufan ka shabab

Dubti hai kashti-e-umr-e-ravan ab kya karun

rahte rahte jab mujhe zindan se ulfat ho chali

hukm hota hai ki kaaTo beḌiyan ab kya karun

sathiyon tak girte paḌte main pahunch jaata ‘sa.id’

ban ga.i divar gard-e-karvan ab kya karun