kya batla.un kaise din main kaaT raha huun
moti huun aur raste men bekar paḌa huun
lambi lambi caron valon se achchha huun
rukhi-sukhi jo milti hai kha leta huun
tanha.i men akasr main socha karta huun
suraj chand sitare kya hain aur main kya huun
badal parbat dariya chashme jangal sahra
kyuun bhate hain main in sab ka kya lagta huun
aag aur paani men kahte hain bair baḌa hai
lekin main to us se mil kar ḳhush hota huun
itni nafrat yaaro mujh se kyuun karte ho
main bhi gulshan ka ik gul huun tum jaisa huun
mere chahne valon ka bhi ik halqa hai
main bhi gulzaron ki vaadi ka jharna huun
mere chal-chalan se bhi kuchh hasil kar lo
main bhi ik autar ka sa darja rakhta huun
ek hi manzar ne ankhon ko Dhanp rakha hai
roz-e-avval se ye suraj dekh raha huun
ḳhud se jab baten karne ko ji chaha hai
ghar se uTh kar nadi kinare ja baiTha huun
mere haal se duniya ka andaza kar lo
main phaldar shajar ka ik piila patta huun
dhyan ko tanha.i ke ghar ka peḌ samjhiye
main bhi us ke saa.e men barson baiTha huun
jaane kis pal ki ḳhushbu hai mere aage
jaane kis duniya ke pichhe dauḌ raha huun
kaise kaise log guzarte hain nazron se
saara din main kaise kaise dukh sahta huun
mere ḳhadd-o-ḳhal ko dekho aur pahchano
main bhi apni irfani ka katba huun
bas ke pahiye ḳhaak uḌa jaate hain mujh par
vo kya janen kaun huun aur kis ka chehra huun
ata-pata kya puchh rahe ho mera logo
rampuri sha.ir huun aur ghazlen kahta huun
Leave a Reply