paas us ke mire gham ka mudava bhi nahin hai
lekin mujhe us shakhs se shikva bhi nahin hai
kya ilm tha ye din bhi dikhaegi mohabbat
vo aise mila jaise shanasa bhi nahin hai
anchal pe tire taank to deta dam-e-rukhsat
palkon pe miri koi sitara bhi nahin hai
hairan huun main aaj sar-e-jada-e-ikhlas
ta-dur koi naqsh-e-kaf-e-pa bhi nahin hai
kuchh habs to tuute ki tiri yaad ka badal
khulta bhi nahin aur barasta bhi nahin hai
‘abid’ gham-e-hasti se nikal jaenge bach kar
is baab men ham ne kabhi socha bhi nahin hai
Leave a Reply