yuun shab-e-hijr bita.i main ne
niind taqon men jala.i main ne
chhoḌ ja.ungi qasam se tujh ko
aur qasam bhi tiri khaa.i main ne
us ki ankhon se chura kar kuchh ashk
raat ki pahli kama.i main ne
us ka gham sard kiya aahon se
dhuup men chhanv mila.i main ne
jaane kyon ruuh ki divar pe aaj
zard si bel chaḌha.i main ne
naam takiye par tira likhna tha
is liye sikhi kaḌha.i main ne
bech kar ‘sa.adiya’ zevar maan ka
puuri ki apni paḌha.i main ne
Leave a Reply