junun pe jabr-e-ḳhirad jab bhi hoshyar hua
nazar ke saath nazara bhi sharm-sar hua
gham-e-jahan! bahut achchha unhen bhala denge
zah-e-nasib agar dil pe iḳhtiyar hua
ye daur daur-e-pur-ashob hi sahi lekin
zamana pahle bhi kab kis ko saz-gar hua
mili hain nau-e-bashar se mujhe vo iza.en
ki jab bhi ghaur kya ḳhud bhi sharmsar hua
kisi se talḳhi-e-halat ka gila hi nahin
ki jo hua vo ba-ima-e-chashm-e-yar hua
ye zindagi ka ufuq bhi ajab ufuq hai ‘zamir’
ki har ḳhayal sitara bana ghubar hua
Leave a Reply