Zindagani Ka Ye Pahlu Kuchh Zarifana Bhi Hai

Sahir Siyalkoti

zindagani ka ye pahlu kuchh zarifana bhi hai

ya.ani us ki har haqiqat ek afsana bhi hai

tum jise jaisa bana dete ho ban jaata hai vo

fitratan har aadmi aaqil bhi divana bhi hai

ranj hi akasr hua karta hai rahat ka nishan

jis jagah tum daam dekhoge vahan daana bhi hai

va-e-qismat ik hamin mahrum is fan se rahe

apne matlab ke liye hushyar divana bhi hai

vaq.at-e-mai-ḳhana bhi apni jagah kuchh kam nahin

qabil-e-tazim go ka.aba bhi but-ḳhana bhi hai

dil ki fitrat ishq-o-ulfat hi main ai ‘sahir’ khuli

ye vo kafir hai ki apna ho ke begana bhi hai