ai dil us zulf ki rakhiyo na tamanna baaqi
hashr tak varna rahegi shab-e-yalda baaqi
tire hangama se ḳhush huun magar ai josh-e-junun
kuchh qayamat ke liye bhi rahe ghaugha baaqi
aap ko bech chuka huun tire gham ke hathon
hai magar ishq ka tere abhi sauda baaqi
gham-e-hijran men ga.i jaan chalo ḳhuub hua
doston ko na rahe fikr-e-mudava baaqi
jaan siine se nikalne ko hai dil pahlu se
hai faqat us nigah-e-naz ka iima baaqi
ḳhak-e-ashiq se ugata hai mughilan ka daraḳht
us ki mizhgan ka hai marqad men bhi khaTka baaqi
Leave a Reply