Khirad Ki Fitna-Samani Jo Pahle Thi Wo Ab Bhi Hai

khirad ki fitna-samani jo pahle thi vo ab bhi hai

mire dil ki pareshani jo pahle thi vo ab bhi hai

uda diin dhajjiyan qanun-e-tazirat ki ham ne

jaraem ki faravani jo pahle thi vo ab bhi hai

gharibon ke gharon men ek bhi raunaq nahin baaqi

bahar-e-qasr-e-sultani jo pahle thi vo ab bhi hai

nazar aati hain har janib nai abadiyan lekin

dilon ki khana-virani jo pahle thi vo ab bhi hai

agarche ahl-e-zar taamir ke vaade to karte hain

magar takhrib-samani jo pahle thi vo ab bhi hai

tabassum hai labon par ya tabassum ka janaza hai

dilon ki marsiya-khvani jo pahle thi vo ab bhi hai

gharibon ke lahu se qumqume raushan hain mahlon ke

havas ki zulm-samani jo pahle thi vo ab bhi hai

kahin suba-parasti hai kahin firqa-parasti hai

vahi tafriq-e-insani jo pahle thi vo ab bhi hai

ghulami aaj bhi hai aur aqai ki surat men

ada-e-jabr-e-sultani jo pahle thi vo ab bhi hai

hai ‘rumi’ khush-nava be-shak ho koi bhi yahan unvan

ada shan-e-ghazal-khvani jo pahle thi vo ab bhi hai

Leave a Comment