Sufi

Wo Pau Phati Wo Kiran Se Kiran Mein Aag Lagi

vo pau phati vo kiran se kiran men aag lagi

vo shab ki zulf-e-shikan-dar-shikan men aag lagi

sulag uthi vo rida-e-nujum-o-kahkashan

vo dekh daman-e-charkh-e-kuhan men aag lagi

nashat-e-garmi-e-mahfil thi jis ki tabani

isi charagh se kyuun anjuman men aag lagi

hazar shams-o-qamar bujh gae pa ye na bujhi

ye kis diye se patangon ke man men aag lagi

tamam umr ke aansu use bujha na sake

jo dil se ta-ba-jigar dam-zadan men aag lagi

bhula sakegi na duniya ye hadisa ki ‘adib’

charagh-e-lala-o-gul se chaman men aag lagi

More Poems

Leave a Comment