Poet
nazar men apni kabhi is qadar bura to na tha
main apne-ap se pahle gurez-pa to na tha
ye kya kiya use taqdir saunp di apni
miri tarah vo ik insan tha ḳhuda to na tha
guzar gaya jo barabar se munh chhupa.e hue
ye sochta huun kahin koi ashna to na tha
kise qubul tha zindan-e-ab-o-gil lekin
ab aur us ke siva koi rasta to na tha
jami thiin mujh pe nigahen jo ik zamane ki
mujhe vo muḌ ke sar-e-rah dekhta to na tha
tamam-umr rahi jis ki justuju ‘ḳhavar’
kahin vo shaḳhs mujhi men chhupa hua to na tha
Leave a Reply