Navin Joshi
ranj yuun rah-e-masafat men mile
kuchh kama.e kuchh virasat men mile
ḳhvab tak men aj-kal risne lage
zaḳhm ham ko jo haqiqat men mile
ab nahin hai taab dil se milne ki
kya pata vo kaisi halat men mile
ek duuje se raqabat thi jinhen
ek duuje ki hirasat men mile
jo andheron men na sha.ista rahe
vo ujalon se ḳhajalat men mile
falsafe jo na sadaqat men mile
vo sabhi ham ko zarurat men mile
is dafa to zindagi jaldi men thi
kah do agli baar fursat men mile
Leave a Reply