DhunDhta hai koi rasta mire a.ine men
qaid jo shaḳhs hai mujh sa mire a.ine men
khinch le tujh ko na a.ine ke andar ka tilism
ghaur se dekh na itna mire a.ine men
us ke jaisa huun main a.ine ke bahar koi
rah raha hai vo jo mujh sa mire a.ine men
main hi a.ina-e-duniya men chala aaya huun
ya chali aa.i hai duniya mire a.ine men
aks kuchh aur nazar aata hai mera sab ko
kis ne ab tak mujhe dekha mire a.ine men
ru-ba-ru hota hai ik shaḳhs bhi mujh sa ‘at.har’
main akela nahin hota mire a.ine men
Leave a Reply