Najeeb Ahmad
ishq-abad faqiron ki ada rakhte hain
aur kya is ke siva ahl-e-ana rakhte hain
ham tahi-dast kuchh aise bhi tahi-dast nahin
kuchh nahin rakhte magar pas-e-vafa rakhte hain
zindagi bhar ki kama.i ye ta.alluq hi to hai
kuchh bache ya na bache is ko bacha rakhte hain
sher men phuTte hain apni zaban ke chhale
nutq rakhte hain magar sab se juda rakhte hain
ham nahin sahib-e-takrim to hairat kaisi
sar pe dastar na paikar pe aba rakhte hain
shahr avaz ki jhilmil se damak uTThenge
shab-e-ḳhamosh ki ruḳh sham-e-nava rakhte hain
ik tiri yaad gale aise paḌi hai ki ‘najib’
aaj ka kaam bhi ham kal pe uTha rakhte hain
Leave a Reply