ye nik.haton ki narm-ravi ye hava ye raat
yaad aa rahe hain ishq ko TuuTe ta.alluqat
mayusiyon ki god men dam toḌta hai ishq
ab bhi koi bana le to bigḌi nahin hai baat
kuchh aur bhi to ho in isharat ke siva
ye sab to ai nigah-e-karam baat baat baat
ik umr kaT ga.i hai tire intizar men
aise bhi hain ki kaT na saki jin se ek raat
ham ahl-e-intizar ke aahaT pe kaan the
ThanDi hava thi gham tha tira Dhal chali thi raat
yuun to bachi bachi si uThi vo nigah-e-naz
duniya-e-dil men ho hi ga.i koi vardat
jin ka suragh pa na saki gham ki ruuh bhi
nadan hue hain ishq men aise bhi sanehat
har sa.i o har amal men mohabbat ka haath hai
ta.amir-e-zindagi ke samajh kuchh muharrikat
us ja tiri nigah mujhe le ga.i jahan
leti ho jaise saans ye be-jan ka.enat
kya niind aa.e us ko jise jagna na aa.e
jo din ko din kare vo kare raat ko bhi raat
dariya ke madd-o-jazr bhi paani ke khel hain
hasti hi ke karishme hain kya maut kya hayat
ahl-e-raza men shan-e-baghavat bhi ho zara
itni bhi zindagi na ho paband-e-rasmiyat
ham ahl-e-gham ne rang-e-zamana badal diya
koshish to ki sabhi ne magar ban paḌe ki baat
paida kare zamin na.i asman naya
itna to le koi asar-e-daur-ka.enat
sha.ir huun gahri niind men hain jo haqiqaten
chaunka rahe hain un ko bhi mere tavahhumat
mujh ko to gham ne fursat-e-gham bhi na di ‘firaq’
de fursat-e-hayat na jaise gham-e-hayat
Leave a Reply