dekhte hain jab kabhi iman men nuqsan shaiḳh
aune-paune bech Daala karte hain iman shaiḳh
ba.ad muddat ke jahan men rahzanon ke din phire
sunte hain phir ho ga.e hain ab police kaptan shaiḳh
har zaban par zikr-e-haq aur dil men hai yad-e-butan
ye nahin khulta ki hain insan ya shaitan shaiḳh
ahl-e-shar to aap ko kahte hain amm-e-mohtaram
aur shaitan aap ko kahta hai bha.i-jan shaiḳh
be-takalluf haath dho kar baiTh jaate hain zarur
dekh lete hain bichha jis ja pe dastar-ḳhvan shaiḳh
shauq hai lekin ḳhilaf-e-vaza.a apni jaan kar
mol le kar ḳhud kabhi khate nahin ik paan shaiḳh
go tajavuz kar chuke hain aap bhi sau saal se
byaah ka rakhte hain lekin aaj bhi arman shaiḳh
jab ki bimar-e-mohabbat ka nahin mumkin ilaaj
de rahe hain phunk kar bekar use loban shaiḳh
kaid ho hirs-o-havas ho ya fareb-o-makr ho
aap hi ke haath rahta hai har ik maidan shaiḳh
‘shauq’-sahab un ki rag rag se hain vaqif ḳhuub ham
us ka ho jaa.e divala jis ke hon mehman shaiḳh
Leave a Reply