rashmi-bhardwaj

Kya Likhun

aksar

likhte hue aata hai

dil men ye saval

kya likhun

us ujle savere ko

jo laata hai apne saath Dheron ummiden

ya likhun

raat ke us andhere ko

jo de jaata hai ankhon men hazaron sapne

kya likhun

in mahakti havaon ko

jo har pal ehsas dilati hain

ki zinda ho tum

ya likhun

un an-ginat duaon ko

jin men huun main sirf main

kyuun na likhun

us hasin chand ko

jo sikhata hai mujhe

sar utha kar asman ki or dekhna

ya likh duun

un ujle sitaron ko

jo sikhate hain

khud ko samet kar chamakte rahna

aur agar bikhro bhi

to tuut kar dua ban jaana

More Poems

Leave a Comment