Sayed Ziyauddin Naeem
barte kuchh imtiyaz to insan kam se kam
ho apne doston ki to pahchan kam se kam
ahl-e-gharaz kisi ke hue hain jo hon mire
itna to soch ai dil-e-nadan kam se kam
hoga yahi bahut se bahut jaan se ja.enge
rah ja.egi vafa ki magar aan kam se kam
chaliye mo.amla ye kisi samt to hua
kam to hua ye roz ka ḳhaljan kam se kam
aisa nahin ki maya-e-ehsas bhi na ho
itne nahin hain be-sar-o-saman kam se kam
na-mumkinat men se to shayad na ho ‘na.im’
aamad bahar ki nahin asan kam se kam
Leave a Reply