Shahzad Ahmad
haal us ka tire chehre pe likha lagta hai
vo jo chup-chap khaḌa hai tira kya lagta hai
yuun tiri yaad men din raat magan rahta huun
dil dhḌakna tire qadmon ki sada lagta hai
yuun to har chiiz salamat hai miri duniya men
ik ta.alluq hai ki jo TuuTa hua lagta hai
ai mire jazb-e-darun mujh men kashish hai itni
jo ḳhata hota hai vo tiir bhi aa lagta hai
jaane main kaun si pasti men gira huun ‘shahzad’
is qadar duur hai suraj ki diya lagta hai
Leave a Reply