Josh-O-Kharosh Par Hai Bahaar-E-Chaman Hanuz

josh-o-kharosh par hai bahar-e-chaman hanuz

piite hain nau-javan sharab-e-kuhan hanuz

paata nahin main yaar ko mel-e-sukhan hanuz

maadum hai kamar ki tarah se dahan hanuz

barson se ro raha huun shab-o-roz muttasil

hanste hain muddaton se mire zakhm-e-tan hanuz

rukhsar-e-yar par nahin aghaz-e-khat abhi

dekha nahin in ankhon ne suraj gahan hanuz

anjam-e-kar ka nahin aata khayal kuchh

ghurbat men bhule baithe hain yar-e-vatan hanuz

aalam un abruon ki kaji ka jo hai so hai

bal kha rahi hai zulf-e-shikan-dar-shikan hanuz

khilat ki kya umiid rakhen asman se ham

us ne to daab rakkha hai apna kafan hanuz

aalam hijab-e-yar ka ta-hal hai vahi

khalvat-nashin hai raushni-e-anjuman hanuz

apne safa-e-sina ka hairan kaar hai

dekha nahin hai aaine ne vo badan hanuz

har-chand bagh-e-dahr men muddat se huun muqim

‘atish’ nazar pada na vo seb-e-zaqan hanuz

Leave a Comment