Poet
bar-e-gham se dam labon par aa gaya
aise jiine se to ji ghabra gaya
ḳhuld ki tarif aḳhir ta-ba-ke
sunte sunte ji mira ukta gaya
haa.e kab laa.i saba paigham-e-zist
ghuncha-e-ummid jab murjha gaya
kaun hota hai kisi ka ḳhizr-e-rah
apni manzil tak har ik tanha gaya
ye bhi kya kam hai shab-e-gham ka karam
mujh ko jiine ka saliqa aa gaya
kyon araq-aluda peshani hui
yaad shayad aap ko kuchh aa gaya
ab to qaul-e-‘dard’ hai vird-e-zaban
bas hujum-e-yas ji ghabra gaya
ajnabi huun aaj main us bazm men
bar-ha ‘talib’ jahan aaya gaya
Leave a Reply