Aslam Ansari
apni sada ki guunj hi tujh ko Dara na de
ai dil tilism-e-gumbad-e-shab men sada na de
divar-e-ḳhastagi huun mujhe haath mat laga
main gir paḌunga dekh mujhe aasra na de
gul kar na de charagh-e-vafa hijr ki hava
tul-e-shab-e-alam mujhe patthar bana na de
ham sab asir-e-dasht-e-huvaida hain dosto
ham men koi kisi ko kisi ka pata na de
sab mahv-e-naqsh-e-parda-e-rangin to hain magar
koi sitam-zarif ye parda haTa na de
ik zindagi-gazida se ye dushmani na kar
ai dost mujh ko umr-e-abad ki dua na de
Darta huun aa.ina huun kahin TuuT hi na ja.un
ik lau si huun charagh ki koi bujha na de
haan mujh pe faiz-e-‘mir’-o-‘firaq’-o-‘nadim’ hai
lekin tu ham-suḳhan mujhe itni hava na de
Leave a Reply