Jigar Barelvi
mohabbat tum se hai lekin juda hain
hasin ho tum to ham bhi parsa hain
hamen kya is se vo kaun aur kya hain
ye kya kam hai hasin hain dilruba hain
zamane men kise fursat jo dekhe
suḳhnavar kaun shai hain aur kya hain
miTate rahte hain ham apni hasti
ki agah-e-mizaj-e-dilruba hain
na jaane darmiyan kaun aa gaya hai
na vo ham se na ham un se juda hain
kabhi ro ro ke sochegi ye duniya
abhi ham kya bata.en aah kya hain
nahin banti hai kuchh bhi kahte sunte
ajab kuchh gu-magu men mubtala hain
ye teri be-ruḳhi ye sargirani
jiye jaate hain jo ham be-haya hain
jigar banta nahin kuchh karte dharte
ki bilkul jaise ham be-dast-o-pa hain
Leave a Reply