koi nishani-e-ahd-e-visal de jaa.e
vo meri umr mire mah-o-sal de jaa.e
use kaho ki kisi roz aa ke phir mujh ko
hasin ḳhvab achhute ḳhayal de jaa.e
palaT ke aa.e kabhi us ki yaad ka mausam
gul-e-murad ko rang-e-jamal de jaa.e
ḳhuda kare ki achanak vo samne aa kar
mire labon ko na.e kuchh saval de jaa.e
tamam umr ki ḳhushiyan sameT kar meri
tamam umr ke apne malal de jaa.e
koi to ho jo mire chara-gar se ja ke kahe
dava kabhi to mire hasb-e-hal de jaa.e
agar nahin hai mudava zaval ka ‘shahid’
vo hausla to ba-vaqt-e-zaval de jaa.e
Leave a Reply