vo sanvar sakta hai ma.aqul bhi ho sakta hai
mera andaza miri bhuul bhi ho sakta hai
ab pas-e-abr hai jab abr se bahar nikla
vo chamak sakta hai maqbul bhi ho sakta hai
duur se dekha hai nazdik se bhi dekhunga
phuul sa lagta hai jo phuul bhi ho sakta hai
aaj ki shab bhi sitaron ne agar saath diya
dil jo be-kar hai mashghul bhi ho sakta hai
kyuun samajhta huun ki aata hai vo meri ḳhatir
sair us shaḳhs ka ma.amul bhi ho sakta hai
taḳht tabdil bhi ho sakta hai taḳhte men kabhi
apne ohde se vo mazul bhi ho sakta hai
janta kaun tha ‘ḳhavar’ vo daraḳhshan taara
gir ke ankhon se kabhi dhuul bhi ho sakta hai
Leave a Reply