Kya Qayamat Hai Gham Ki Girai

kyā qayāmat hai ġham kī gīrā.ī

hañsnā chāhā to aañkh bhar aa.ī

un kī yādoñ kī jalva-ārā.ī

kitnī raushan hai shām-e-tanhā.ī

marhabā ai junūñ kī rusvā.ī

un ke hoñToñ pe bhī hañsī aa.ī

kis kī aamad kī hai ḳhabar yārab

dil kī dhaḌkan banī hai shahnā.ī

koī jaada na koī manzil hai

zindagī kis maqām par aa.ī

lab pe mohar-e-sukūt hai lekin

mil ga.ī hai nazar ko goyā.ī

ab ‘mubārak’ kī zindagī kyā hai

un kī yaad aur kunj-e-tanhā.ī

Leave a Comment