lafz ki qaid se riha ho ja
aa miri aankh se ada ho ja
phenk de ḳhushk phuul yadon ke
zid na kar tu bhi be-vafa ho ja
ḳhushk peḌon ko kaTna paḌta hai
apne hi ashk pi hara ho ja
chheḌ is habs men mahakti ghazal
aur dar kholti hava ho ja
sang barsa rahe hain shahr ke log
tu bhi yuun haath uTha dua ho ja
ḳhud ko pahchan idhar udhar na bhaTak
apne markaz pe da.era ho ja
aur phir ho gaya main a.ina-ru
us ne ik baar hi kaha ho ja
kahin andar se aaj bhi ‘tauqir’
ik sada aati hai mira ho ja
Leave a Reply