Bakhtiyar Ziya
rudad-e-shauq ye hai miri muḳhtasar tamam
ra.ana.iyon men kho gaya zauq-e-nazar tamam
guzra hai gul-badan koi meri talash men
mahki hui hai aaj miri rahguzar tamam
vo din bhi kya the jab thi havaon se guftugu
ab ham se baat karte hain divar-o-dar tamam
ḳhud apna ehtisab gavara nahin unhen
auron men aib DhunDte hain dida-var tamam
tanha.iyan nasib ka unvan ban ga.iin
ek ek kar ke chhuT ga.e ham-safar tamam
hone lage hain meri ḳhamoshi pe tabsire
ab jaan le ke chhoḌenge ye charagar tamam
kya soch kar chale the ‘ziya’ rah-e-shauq men
shayad na ho sake ye safar umr-bhar tamam
Leave a Reply